由傷痛、冤屈到尋回自我價值

影片：

https://m.youtube.com/watch?v=TC03_DFPt9Q&feature=share

00:41:00 - 00:57:40 舊的生命故事

00:57:40 - 01:04:30 重寫生命故事

文字節錄 （00:58:00 - 01:04:30）：

我喺讀輔導嗰陣時，學到敘事治療。當時發現，原來上帝係可以將我嘅人生改變，亦都發現，原來上帝先係我最重要！所以我一定要捉住上帝，唔會放開佢！

喺我重新再由頭寫過我嘅人生故事當中，原來上帝一齊同我去寫新嘅一頁。我人生嘅上半場，就只有丈夫同埋仔，佢比我好多嘅傷痛，令到我冇晒尊嚴，任由佢擺佈、欺騙、出賣。好嬲、好多冤屈。因為喺人眼中，我不缺物質，因為世間上所有人都係金錢掛帥。當時我乜都有，所以人哋係唔會感覺得我唔快樂、唔幸福、唔開心。啲人會覺得你自己攞嚟嘅！但其實我唔係想要呢啲呀嘛！到中場，我嘅Focus視線就喺我個仔身上，我以仔為中心，冇咗我自己。到最後尾，佢令到我好傷心，我好難接受佢會咁樣對我，令我跌入去好抑鬱當中，好無助、好孤單，唔知點好！

後來神藉着敘事治療，話俾我聽 ，我嘅劇本可以重寫。我就將我嗰個劇本，擺落一個盒裏面。我將開頭以個仔為中心、焦點，我就將個仔擺歪少少，咁我可以多咗啲空間出嚟，搵一啲屬於我要嘅嘢，屬於我嘅嘢！我發現原來我好有跳舞嘅天份，做運動好叻、好有天份，煮嘢，我亦都OK啦！都可以嘅！亦都有時間可以同人講信仰，再建立朋友之間親密嘅關係。我去學嘢啦，同埋最緊要最緊要就係神！我而家以神為中心，其他我仲有好多空間，可以放一啲自己認為我嘅長處，自己嘅優點落去！就係咁樣樣，我慢慢，慢慢重拾返我嘅自信心。

我以前係毫無安全感！但係喺呢度，我搵返我自己，我認同返我自己，我搵到我自己嘅價值呀，原來我係有價值！喺神裏面，我係有價值嘅！

我將我嘅盒入邊，將所有嘅嘢慢慢、慢慢、一點一點咁去加落去。我再冇時間去諗一啲負面嘅嘢，自己唔得嘅嘢！好似舉例一樣嘢就係，以前我同我家人係唔接觸、唔來往㗎！因為我怕咗佢哋，佢哋搵我只係攞着數，喺我身上面不停去揸宰我。所以我好抗拒，我唔同佢地有任何嘅接觸。但係當我重組呢個盒入邊嘅擺位嘅時候，我發覺我已經充滿自信！恐懼感減少左，安全感多咗，我唔怕同佢哋去接觸，我唔怕佢哋攞我着數，我夠胆去接觸佢哋，因為我係定清咗一條嘅界線，我唔會俾佢哋闖過我條界線，所以我就好安全，唔會再俾佢哋再受傷害。

我發覺寫吓寫吓，我覺得原來我有好多嘢，我仲有可以分享出去㗎喎！我以前我淨係揸住一塊餅，我擁有嗰塊餅，我驚人攞走，好驚啊！我覺得我自己都不足，我自己都冇能力，我點可以分出去呢？原來上帝同我講，唔係呀！你仲有好多好多嘢！當我嘅自信心，當我所有有價值嘅嘢，我自我認同感返晒黎之後，我發覺原來唔係㗎！我有更多嘅嘢，我可以分享出去！

我可以攞返我嘅話事權，神藉着敘事治療，幫我重拾人生！我學懂點樣去接納返我自己，我要點樣去欣賞返我自己。只要我唔會走出神嘅軋跡當中，我就係安全嘅！

⋯⋯我好感激教我敘事治療嘅張sir！